Daryo o‘zanlarida qum-shag‘alni litsenziyasiz qazib olish mumkin bo‘ldi

Daryolar o‘zanlari va qirg‘oqbo‘yi mintaqalarida qum-shag‘al materiallarini qazib olish tartibi soddalashtirildi, deb xabar berdi Norma axborot-huquqiy portali.

Qayd etilishicha, buning uchun endi litsenziya talab etilmaydi. Eslatib o‘tamiz, umumiy qoidaga ko‘ra, ko‘rsatilgan uchastkalarda noruda foydali qazilmalarni qazib olish qat'iy litsenziyaga muvofiq amalga oshiriladi.

Shu bois daryo o‘zanlarida qum-shag‘al materiallarini qazib olish uchun litsenziyalarni endi uzaytirish yoki qayta rasmiylashtirish lozim emas. Amaldagilari esa ularning muddati tugagunga qadar kuchda bo‘ladi, basharti yer qa'ri uchastkalaridan foydalanish huquqi cheklanmasa, to‘xtatib turilmasa yoki tugatilmasa.

Bunda daryolar o‘zanlarida qum-shag‘al materiallarini faqat ularni tozalash jarayonida qazib olish mumkin va FVV huzuridagi “Xavfsiz daryo” DUK tomonidan shartnoma asosida jalb etilgan tadbirkorlik sub'yektlari va boshqa tashkilotlarga ruxsat berilgan.

Daryo o‘zanlarida va qirg‘oqbo‘yi mintaqalaridagi istiqbolli uchastkalarda geologik o‘rganish uchun 2019 yil 1 iyul kuniga qadar litsenziyalar olgan tadbirkorlik sub'yektlari, istisno tariqasida, “Xavfsiz daryo” DUK bilan qum-shag‘al materiallarini qazib olish yuzasidan to‘g‘ridan-to‘g‘ri shartnoma tuzishlari mumkin. Qolgan hollarda tanlash «Ye-IJRO AUKSION»da tanlov asosida elektron savdolar orqali amalga oshiriladi.

Tayyorlagan: Дилшод Аскаров

#qum-shag‘al