Norboyeva binolarni kimo‘zarga qurib, bayramga bitkazadigan hokimlarni tanqid qildi

Senat raisi Tanzila Norboyeva ayrim hokimlar binolarni bayramga mo‘ljallab topshirishga harakat qilishi, natijada belgilangan me'yoriy qoidalar nazardan chetda qolishini tanqid qildi.

«Hozir hokimlar o‘rtasida rosa avj olgan ─ binolarni kimo‘zarga qurib, bayramlarga yetkazib topshirishga harakat qilishyapti. Lekin aniq belgilangan sanitariya normalari mavjud. Ular bilan birov hisoblashyaptimi?

Sanitariya talablariga mos bo‘lmasa ham foydalanishga topshirib yuborishadi. Kerakli mutaxassis ko‘rigidan o‘tgan-o‘tmagani bo‘yicha hech qanday normativ ham yo‘q», ─ dedi Tanzila Norboyeva Senat kengashining 24 dekabrdagi majlisida.

Majlisda chiqish qilgan Sanitariya-epidemiologiya nazorati davlat inspeksiyasi boshlig‘i Nurmat Otabekovning ma'lum qilishicha, oziq-ovqat tayyorlash uchun mo‘ljallab qurilmagan va keyinchalik shu maqsadda foydalanish uchun moslashtirilgan binolar – ovqatdan ommaviy zaharlanish holatlarining sabablaridan biri sanaladi.