Tesla maoshlar kamayishi va ayrim xodimlar ishdan bo‘shatilishini e'lon qildi

Milliarder Ilon Maskka qarashli Tesla kompaniyasi koronavirus sababli AQShdagi zavodlari yopilishi tufayli xodimlarning oylik maoshlari qisqartirilishini e'lon qildi. Kompaniyaning Shimoliy Amerikadagi rahbari Valeri Kapers Vorkman ikkinchi chorakda barcha yollanma ishchilarning maoshi vaqtincha qisqartirilishi to‘g‘risida maktub yo‘lladi, deb yozmoqda Protocol nashri.

Qayd etilishicha, kompaniyaning vitse-prezident va undan yuqori lavozimdagi rahbarlarining maoshi 30 foizga, direktorlarniki 20 foizga qisqartiriladi. Qolgan barchaning oyligi 10 foizga kamayadi.

Tesla shuningdek, muhim hisoblanmaydigan va masofadan ishlay olmaydigan xodimlarining bir qismini ham ishdan bo‘shatadi.

Maosh qisqarishi va ishdan bo‘shatishlar 13 apreldan boshlanadi.  

Kompaniya Kaliforniyadagi elektromobillar va Nyu-Yorkdagi quyosh panellari ishlab chiqaruvchi zavodlari ishini 24 martda to‘xtatgandi.