Rossiyalik harbiylarga xizmat vaqtida gadjetlardan foydalanish taqiqlab qo‘yildi

Bu haqda Rossiya prezidentining yangi farmonida aytilgan.

Rossiya qurolli kuchlarining intizom nizomiga kiritilgan o‘zgarishlarga ko‘ra, ushbu taqiqlovning buzilishi intizomning qo‘pol buzilishi deb qabul qilinadi. 

Ta'kidlanishicha, ushbu taqiqlov harbiy jangovar harakatlarda, qurolli ixtiloflarda, Rossiyadan tashqarida xalqaro tinchlik va xavfsizlikni qo‘llab-quvvatlash yoki tiklash bo‘yicha faoliyatni o‘tashda yoki xalqaro terrorchilik faoliyatiga chek qo‘yish bo‘yicha vazifalarni bajarishda amal qiladi.

Bundan tashqari, bunday qurilmalarni jangovar navbatchilik, jangovar xizmatni o‘tashda, naryadlarda bo‘lganda, kemalar mashg‘ulotlari va safarlarida ishtirok etganda, harbiy qism hududida bo‘lganda, harbiy yig‘inlarni o‘tash vaqtida qo‘llash taqiqlanadi.

2019 yil fevralda Rossiya davlat dumasi harbiylarga va harbiy xizmatga chaqirilganlarga muayyan harbiy majburiyatlarni bajarishda telefon, planshetlar yoki ma'lumotni saqlash funksiyasiga ega va internetga ulangan qurilmalarga egalik qilishni taqiqlovchi qonunni qabul qilgan.