Afrikadagi ilk Olimpiada o‘yinlari boshqa sanaga ko‘chirildi

Xalqaro Olimpiya Qo‘mitasi (XOQ) va Senegal hukumati o‘smirlar o‘rtasidagi 2022 yilgi yozgi Olimpiada o‘yinlarini boshqa sanaga ko‘chirish haqida kelishib olishdi.

Foto: IOC / NELSON CHAVES

XOQ matbuot xizmati xabariga ko‘ra, musobaqa 2026 yili Senegal poytaxti Dakar shahrida o‘tkaziladi.

Bunday qaror Senegal prezidenti Maki Sall iltimosiga ko‘ra qabul qilindi. Afrikadagi ilk Olimpiada o‘yinlarining ko‘chirilishiga koronavirus pandemiyasi oqibatida kelib chiqqan salbiy holatlar sabab bo‘ldi.

Bundan tashqari, 2020 yilgi Tokio Olimpiadasining 2021 yilga ko‘chirilishi, 2022 yilda esa Pekinda qishki Olimpiada o‘yinlarining o‘tkazilishi ham bu qarorning qabul qilinishiga ta'sir qildi. XOQ qisqa vaqt ichida bir necha yirik musobaqalarning o‘tkazish imkoniyati cheklangan deb hisobladi.

O‘smirlar o‘rtasidagi Olimpiadaning ko‘chirilishi haqidagi qaror XOQ ijroqo‘mi tomonidan ma'qullandi va 17 iyul kuni XOQ sessiyasida qabul qilinadi.

O‘smirlar o‘rtasidagi Olimpiada o‘yinlari 2010 yildan beri o‘tkazilmoqda. Dastlabki musobaqa Singapurda bo‘lib o‘tdi. Keyinchalik, o‘yinlarni Xitoyning Nankin (2014) va Argentinaning Buenos-Ayres (2018) shaharlari qabul qildi.