Navoiyda 5ta obekt YuNeSKO ro‘yxatiga kiritiladi

Madaniy meros obektlarini YuNeSKOning Butunjahon madaniy merosi yodgorliklari ro‘yxatiga kiritish ishlari 2021 yilning aprel oyida to‘liq yakunlanadi.

Prezidentning 2019 yil 12-13 mart kunlari Navoiy viloyatiga tashrifi davomida berilgan topshirig‘i va kengaytirilgan tarzda o‘tkazilgan 11-sonli yig‘ilish bayonining 107-bandiga muvofiq “Buyuk Ipak Yo‘li”ning Zarafshon-Qoraqum qismida joylashgan “Qosim-Shayx”, “Mirsaid Bahrom”, “Raboti-Malik”, “Sardoba”, “Mavlono Orif Deggaroniy” madaniy meros obektlarini YuNeSKOning Butunjahon madaniy merosi yodgorliklari ro‘yxatiga kiritish vazifasi topshirilgan.

Navoiy viloyati hokimligi xabariga ko‘ra, mazkur topshiriq ijrosi yuzasidan yuqorida ko‘rsatilgan obektlarni YuNeSKOning Butunjahon madaniy merosi ro‘yxatiga kiritish bo‘yicha o‘tgan yilning 20 may kuni viloyat turizmni rivojlantirish hududiy boshqarmasi va O‘rta Osiyo Xalqaro tadqiqotlar instituti (IICAI) o‘rtasida loyihaning umumiy qiymati 11 00,0 mln. so‘mlik ikki tomonlama shartnoma imzolandi.

Qayd etilishicha, “Qosim-Shayx”, “Mirsaid Bahrom”, “Raboti-Malik”, “Sardoba”, “Mavlono Orif Deggaroniy” madaniy meros obektlarini YuNeSKOning Butunjahon madaniy merosi yodgorliklari ro‘yxatiga kiritish ishlari 2021 yilning aprel oyida to‘liq yakunlanadi.