Aralash jang san'ati bo‘yicha «Mudofaa vaziri kubogi» musobaqasi yakunlandi

Musobaqaning birinchi va ikkinchi kunlari saralash va yarim final bosqichi doirasidagi janglar tashkillashtirildi. Respublikaning turli viloyatlari hamda Toshkent shahridan kelgan yuzdan ortiq sportchi ishtirokidagi murosasiz bahslar natijalariga ko‘ra, to‘qqizta vazn toifasida finalchilar nomi aniqlandi.

Yakshanba kuni musobaqaning tantanali ochilish va final bosqichi bo‘lib o‘tdi. Marosimda Mudofaa vaziri Bahodir Qurbonov, Markaziy Osiyo aralash jang san'ati konfederatsiyasi rahbari Otabek Umarov, Milliy olimpiya qo‘mitasi bosh kotibi Oybek Qosimov, taniqli sportchilar va faxriy mehmonlar ishtirok etishdi.

Mudofaa vaziri kubok bahslarini ochiq deb e'lon qildi. Qiziqarli kechgan janglar yakunida «Mudofaa vaziri kubogi» g‘olib va sovrindorlari nomi aniqlandi. O‘tkazilgan to‘qqizta bellashuv natijasiga ko‘ra, umumjamoa hisobida birinchi o‘rinni Mudofaa vazirligi jamoasi egalladi.

Tadbir yakunida g‘olib va sovrindorlarga medallar, diplom hamda qimmatbaho esdalik sovg‘alari topshirildi, deyiladi Mudofaa vazirligi Axborot va ommaviy kommunikatsiyalar departamenti xabarida.