Samoada birinchi kasallanish holati qayd etildi

Tinch okeanida joylashgan mitti davlat Samoada koronavirusga chalinish bo‘yicha ilk holat qayd etildi. 

Orol davlat bosh vaziri Tuilaepu Sailele Maliyelegaoining ma'lum qilishicha, infeksiya Samoaga Yangi Zelandiyaning Oklend shahridan kelgan dengizchida aniqlangan.

Uning majburiy karantinni o‘tagan vaqtida topshirgan testi musbat chiqqan. Shu bilan birga, bemor yana bitta test topshirgan, biroq uning natijasi manfiy chiqqan.

“U standart tartibotga ko‘ra, darhol yakkalandi. Ikkinchi test ertalab soat 6da o‘tkazilgan va manfiy chiqqan”, deb ma'lum qilgan Samoa bosh vaziri.

Ma'lum qilinishicha, ayni vaqtda bemor shifoxonada yakkalangan holda saqlanmoqda.

Samoa bungacha koronavirus qayd qilinmagan dunyodagi oz davlatlardan biri bo‘lib qolayotgandi.