Toshkentdagi barcha radarlar to‘liq ishlamoqda – YHXBB

Ichki ishlar vazirligi YHXBB boshlig‘i o‘rinbosari Erali Bozorov maxsus avtomatlashtirilgan foto va video qayd etish moslamalari bugungi kunda to‘liq ishlayotganini ma'lum qildi.

«To‘g‘ri, oldinroq bu borada ozgina muammolar bo‘lgan edi. Bu muammolar hozirgi kunda yechilgan. Hozirgi kunda birorta ham sertifikatdan o‘tkazilmagan qoidabuzarlikni aniqlash moslamalaridan foydalanilmayapti.

Avvalroq tezlikni o‘lchash (radar) moslamalarida muammo paydo bo‘lgan edi. Ayni paytda ushbu fotoradar moslamalari ishlatilmayapti hamda yo‘llarda o‘rnatilgan radarlar bugungi kun talabiga mos keladi», deydi Erali Bozorov.

Eslatib o‘tamiz, avvalroq Toshkent shahar hokimligi mas'ul xodimi Toshkent shahri chorrahalariga Shveytsariya kompaniyasi tomonidan o‘rnatilgan qoidabuzarliklarni qayd etuvchi videokuzatuv moslamalarining litsenziyasi tugagani aytgan, biroq IIV YHXBB mas'ul xodimi ushbu ma'lumotni rad etib, kameralarga litsenziyalar muayyan muddatga emas, balki umrbod berilganini bildirgandi.