«Korzinka»dagi ehson qutisidan 50 ming dollar solingan konvertlar chiqdi

Tadbirkorning so‘zlariga ko‘ra, tarmoqning barcha filiallarida ehson qutilari o‘rnatilgan bo‘lib, ularga saxovatli xaridorlar xayriya maqsadida pul tashlab ketishadi. «Korzinka.uz» tarmoqlaridagi ushbu qutilarga tushgan barcha mablag‘lar saraton xastaligiga chalingan bemor bolalarga yordam berish maqsadida tashkil etilgan «Ezgu Amal» xayriya jamg‘armasi hisobiga yo‘naltiriladi.

To‘lgan qutilar korxona xodimlari va mutasaddilari, jamg‘arma hamda jamoatchilik vakillari bilan birgalikda ochilib, ichidagi pullar sanab chiqiladi va jamg‘arma hisob raqamiga topshiriladi.

«Bugun navbatdagi quti ochilib, pullar sanalib, taxlayotganimizda, qutidan o‘ndan ortiq oq konvert chiqdi. Ularni ochib qarasak, konvertlar ichidan jami 50000 dollar pul bor ekan. Og‘ir kasalga chalingan bolakaylarga Ramazon oyining tabarruk kunlarida shunday go‘zal ehson qilgan noma'lum hamyurtimizning bunday xolis amali bu hodisa shohidi bo‘lgan barchamizda ushbu muborak Oyning ajoyib xislatlariga bo‘lgan ishonchimizni yanada kuchaytirdi. Konvertdagi ushbu pullar so‘mga o‘girilib, jami 564 120 000 so‘m mablag‘ xayriya jamg‘armasiga yuborildi», deyiladi sahifadagi xabarda.

Kun.uz muxbiri tadbirkor Zafar Hoshimov bilan bog‘lanib, uning fikrlari bilan qiziqdi.

«Bu voqeani ijtimoiy tarmoqqa joylash yoki joylamaslik haqida biroz ikkilandim va o‘ylab ko‘rib, yozishga ahd qildim. Bu xabarni joylashdan yakka yagona maqsad g‘oyibi ehson sohibiga qilgan ehsoni o‘z joyiga, unga muhtoj bo‘lib turganlarga yetib borganligi haqida hisobot berish bo‘ldi.

Modomiki, bu saxovatli inson shu xayriyani yetkazishda bizni munosib vositachi deb topgan, bizga juda katta ishonch bildirgan. Ushbu ishonchga «Korzinka»ni munosib ko‘rgani uchun korxonamiz va o‘zim nomimdan cheksiz minnatdorchilik bildiraman», dedi tadbirkor.