“Korzinka” Afzal Market nomi ostida yangi formatdagi savdo nuqtalarini ishga tushirmoqda

Yangi format birlamchi ehtiyoj tovarlarining serobligini oshirish va kundalik xaridlar uchun yanada qulay yechimlarni yaratishga yo‘naltirilgan. Afzal Market mavjud konsepsiyani to‘ldirgan holda riteylerning ekotizimiga hamohang uyg‘unlashadi. Agar odatiy “Korzinka” supermarketlari o‘zining keng ko‘lami tufayli haftalik katta xaridlar ehtiyojini qondirsa, “Korzinka Mahalla” do‘konlari “uy yaqinida” formatiga mos kelib, yo‘l-yo‘lakay qo‘shimcha xarid qilish imkoniyatini ta’minlasa, Afzal Market esa eng xaridorgir tovarlarni hamyonbop narxlarda taklif etishga chorlangan.

Afzal Market bu mamlakatning kichik shaharlari va qishloqlarida barcha zarur xaridlarni tez va qulay amalga oshirish imkonini beruvchi, taxminan 250–300 kvadrat metr maydonga ega bo‘lgan kichik do‘konlar silsilasidir. Format o‘zida hamyonbop narxlar, 2000 dan ortiq turdagi har xil mahsulotlar va zamonaviy tarmoqqa oid sifat standartlarini uyg‘unlashtiradi.

Do‘konlarda kundalik ehtiyojga taalluqli asosiy mahsulotlar (go‘sht, meva-sabzavotlar, baqqollik mahsulotlari, shirinliklar, bolalar tovarlari, ichimliklar, maishiy kimyo, shaxsiy gigiyena vositalari) taqdim etilgan. Zamonaviy savdo texnologiyalari, o‘z navbatida, zaxiralarni samarali boshqarish va xaridorlarga kerakli mahsulotlarni maqbul narxlarda taklif etish imkonini beradi.

“Afzal Market bu — biz avvalo hududlar va kichik aholi punktlarida rivojlantirayotgan yo‘nalish bo‘lib, u tayanch mahsulotlarni qulay va xavfsiz zamonaviy savdo formatida taqdim etish uchun mo‘ljallangan. Biz aholining asosiy ehtiyojlariga e’tibor qaratib, sifat, assortiment va oziq-ovqat xavfsizligi masalalarida har kuni murosasiz hamyonbop narxlarni taklif etish maqsadida jarayonlarni optimallashtirdik. Biz uchun yangi formatdagi narx siyosati bozordagi o‘rtacha oziq-ovqat savati narxidan ham pastroq bo‘lishi g‘oyat muhim. Bu kundalik turmushga qulaylik bag‘ishlab, osonroq, arzonroq va sifatliroq xarid qilish imkonini beradi”, – dedi “Korzinka” supermarketlar tarmog‘i asoschisi Zafar Hoshimov.

Afzal Market’ning narx siyosati soddalashtirilgan operatsion modelga asoslangan. Do‘konlarning kichik maydoni savdo nuqtalariga sarflanuvchi chiqimlarni qisqartiradi, optimallashtirilgan assortiment esa saqlash va logistika xarajatlarini kamaytirishga yordam beradi. Boz ustiga, “Afzal” do‘konlari xaridorlarimizning butun sikldagi ehtiyojlarini qondira oladi. Bunda tovarlarni yirik partiyalarda xarid qilish va tashish qo‘shimcha ahamiyat kasb etib, yetkazib beruvchilar bilan yanada qulay shartlarda ishlash imkoniyatini yaratadi.

Ilk “Afzal” do‘konlarining ochilishi ijtimoiy tarmoqlarda qizg‘in muhokamalarga sabab bo‘ldi. Ko‘plab foydalanuvchilar xos dizaynning tanish elementlariga e’tibor qaratib, buni ehtimoliy nusxa ko‘chirish deb hisoblagan holda, “Korzinka” brendini qo‘llab-quvvatladi. Kompaniyaning ta’kidlashicha, xaridorlarning bunday ishtiroki va sodiqligi g‘oyatda qadrlidir. Aslida, Afzal Market – “Korzinka” jamoasi tomonidan ishlab chiqilgan yangi format. Loyiha kompaniyaning to‘plangan tajribasi asosida yaratilgan bo‘lib, xaridorlar uchun xuddi shunday qulay va sevimli xarid maskanini tashkil etishga qaratilgan.

Afzal Market do‘konlarining faoliyatiga doir barcha ma’lumotlar https://t.me/afzalmarketuz sahifasida e’lon qilinadi.

Agar sizda maydoni 250 kvadrat metrdan ortiq ko‘chmas mulkingiz bo‘lsa, uni ijaraga berish haqidagi taklifingizni rent.korzinka.uz yagona portaliga yuborishingiz mumkin.

Kompaniya haqida

“Korzinka” 1996 yilda ta’sis etilgan. Hozirgi paytda tarmoq mamlakatning 12 ta hududida 250 tadan ziyod savdo nuqtasini birlashtiradi: “Korzinka” supermarketlari, “uy oldida” formatidagi “Korzinka Mahalla” va “Afzal Market”, “Korzinka Biznes” ulgurji savdo do‘koni, shuningdek Korzinka Go onlayn-supermarketi.

Afzal Market haqida

Afzal Market – qulay narxlar, 2000 dan ortiq kundalik ehtiyoj mollari va “Korzinka” tarmog‘ining sifat standartlarini o‘zida mujassam etgan, uy yaqinidagi manfaatli xaridlar uchun taxminan 250–300 kv.m maydonga ega ixcham do‘konlar.