Qarshi shahridagi chorrahada yuk mashinasi va “Nexia-3” to‘qnashdi

Qarshi shahrida joylashgan chorrahalardan birida “MAN” rusumli yuk mashinasi va “Nexia-3” to‘qnashgan. Bu haqda IIV YHXB xabar bermoqda.

Ma'lum qilinishicha, joriy yil 2 avgust kuni soat 14:50 larda, Qarshi shahar, Islom Karimov hamda Amir Temur ko‘chalari kesishgan chorrahada haydovchi E.D. boshqaruvidagi “MAN” rusumli yuk mashinasi hamda haydovchi I.U. boshqaruvidagi “Nexia-3” ishtirokida to‘qnashuv sodir bo‘lgan.

Oqibatda “Nexia-3” mashinasi haydovchisi tan jarohati olgan va shifoxonaga yotqizilgan.

Ijtimoiy tarmoqlarda mazkur yo‘l-transporti hodisasi tasvirlangan video tarqaldi. Unda svetoforning yashil chirog‘ida harakatlanib, chorraha o‘rtasiga yetgan “Nexia-3” mashinasini boshqa ko‘chadan chiqib kelgan yuk mashinasi kelib urgani va chorraha chetigacha surib borganini ko‘rish mumkin.