Afg‘onistondan O‘zbekistonga qator davlatlar fuqarolari evakuatsiya qilinmoqda

Germaniya Mudofaa vazirligining Airbus A400M samolyoti nemis va afg‘on fuqarolarini, shuningdek, YeIning qator davlatlari fuqarolarini Kobul aeroportidan evakuatsiya qildi. Bu haqda Germaniyaning O‘zbekistondagi elchixonasi matbuot xizmati xabar berdi.

«Kecha Bundesverning yana bir A400M rusumli uchog‘i ko‘plab insonlarni Kobuldan evakuatsiya qildi. Bugunga qadar 260dan ziyod insonlarning xavfsizligi ta'minlandi. O‘zbekiston orqali ular Germaniyaga uchadilar», deyiladi xabarda.

Ma'lum qilinishicha, Toshkent va Kobul o‘rtasidagi havo ko‘prigi Kobulda xavfsizlik holati bunga imkon berguniga qadar, evakuatsiyaning jadal davom etishini ta'minlaydi.

Eslatib o‘tamiz, O‘zbekiston prezidenti Shavkat Mirziyoyev 17 avgust kuni Germaniya Federativ Respublikasi prezidenti Frank-Valter Shtaynmayyer bilan telefon orqali muloqot qildi.

Suhbat davomida Afg‘onistondan Germaniya fuqarolarini evakuatsiya qilish masalalari bo‘yicha hamkorlik ham davom ettirilishi qayd etilgan.

#Germaniya #Afg‘oniston #evakuatsiya