Hududlarni rivojlantirish bo‘yicha sektorlar faoliyati baholanadi

Hukumat qarori bilan Hududlarni kompleks ijtimoiy-iqtisodiy rivojlantirish bo‘yicha sektorlar faoliyati samaradorligini baholash tartibi to‘g‘risidagi nizom tasdiqlandi

Prezident huzuridagi Davlat xizmatini rivojlantirish agentligi tomonidan sektorlar faoliyatini baholash bir yilda bir marotaba – hisobot yilidan keyingi yilning 1 fevraliga qadar amalga oshiriladi. Natijasi bo‘yicha tahliliy ma'lumotnoma Prezident Administratsiyasi, Vazirlar Mahkamasi va xalq deputatlari Kengashlariga kiritiladi.

Baholash natijasiga ko‘ra tuman, shahar sektorlari o‘rtasida respublika darajasida – “eng namunali sektor” hamda Qoraqalpog‘iston Respublikasi, viloyatlar va Toshkent shahri darajasida – “eng tashabbuskor sektor” nominatsiyalari bo‘yicha g‘oliblar aniqlanadi va rag‘batlantiriladi.

Baholash quyidagi ustuvor yo‘nalishlarda amalga oshiriladi:

“Temir daftar”, “Ayollar daftari”, “Yoshlar daftari” bilan ishlash natijadorligi;
“mahallabay” ishlash tizimining yuritilishi holati;
iqtisodiy rivojlanish va ijtimoiy xizmatlardan foydalanish darajasi;
tadbirkorlikni rivojlantirish;
jinoyatchilikni kamaytirish va ijtimoiy-ma'naviy muhitni sog‘lomlashtirish;
murojaatlar bilan ishlash samaradorligi.

Shunga ko‘ra, g‘olib bo‘lgan sektorlar quyidagicha rag‘batlantiriladi:

“Eng namunali sektor” nominatsiyasida:

1-o‘rin – bazaviy hisoblash miqdorining 500 baravari;
2-o‘rin – bazaviy hisoblash miqdorining 400 baravari;
3-o‘rin – bazaviy hisoblash miqdorining 300 baravari miqdorida pul mablag‘i.

“Eng tashabbuskor sektor” nominatsiyasida:

1-o‘rin – bazaviy hisoblash miqdorining 200 baravari;
2-o‘rin – bazaviy hisoblash miqdorining 150 baravari;
3-o‘rin – bazaviy hisoblash miqdorining 100 baravari miqdorida pul mablag‘i.

Sektorlar faoliyati samaradorligi ko‘rsatkichlarini hisoblash va baholash bo‘yicha “sektor.reyting.uz” avtomatlashtirilgan onlayn axborot tizimi ishga tushiriladi.