Samarqanddagi Cho‘ponota tepaligi Milliy koordinatalar tizimining nol nuqtasi bo‘ldi

Vazirlar Mahkamasining 2026 yil 10 fevraldagi 49-son qarori bilan “O‘zbekiston Respublikasi Milliy koordinatalar tizimi to‘g‘risida”gi nizom tasdiqlandi.

Qarorga ko‘ra, Milliy koordinatalar tizimi quyidagi asosiy tarkibiy qismlardan iborat bo‘ladi:

• Milliy geodeziya referens datumi;
• Yer gravitatsiya maydonining global modeli;
• Milliy koordinatalar tizimining boshlang‘ich nol nuqtasi;
• Davlat geodeziya tarmog‘i punktlari kataloglari;
• Milliy koordinatalar tizimi ma’lumotlar bazasi.

Shuningdek, Milliy koordinatalar tizimining boshlang‘ich nol nuqtasi Samarqand viloyati Samarqand shahridagi Cho‘ponota tepaligida joylashgan Davlat geodeziya punkti etib belgilandi.

Qayd etilishicha, EGM2008 Milliy koordinatalar tizimida Yer gravitatsiya maydonining global modeli hisoblanadi.

Nizomga muvofiq, Milliy koordinatalar tizimi ma’lumotlar bazasidan Milliy koordinatalar tizimining veb-sahifasi orqali foydalanish nazarda tutilgan.