Navoiy viloyatiga bankir emas, soliqchi hokim bo‘ladi

Navoiy viloyatiga Xalq banki raisi Shuhrat Atabayev hokim bo‘lishi haqidagi xabar tasdiqlanmadi, viloyat rahbarligiga Normat Tursunov kelmoqda.

Ayni vaqtda xalq deputatlari Navoiy viloyati kengashining navbatdan tashqari sessiyasi bo‘lib o‘tmoqda. Sessiyada tashkiliy masala ko‘rib chiqilmoqda.

Normat Tursunov. Foto: Davlat soliq qo‘mitasi

Kun.uz manbasi xabar berishicha, viloyat hokimi o‘zgarib, Qobul Tursunov o‘rnini Normat Tursunov egallaydi.

Normat Tursunov muqaddam Navoiy viloyati davlat soliq boshqarmasi boshlig‘i bo‘lgan, 2017-2018 yillarda Davlat soliq qo‘mitasi raisi o‘rinbosari vazifasida faoliyat yuritgan, 2018 yil iyunidan buyon Toshkent shahar davlat soliq boshqarmasi boshlig‘i lavozimida ishlab kelayotgandi.

Bundan oldinroq, bir necha manbalar 2016 yildan buyon Navoiy viloyati hokimi vazifasida ishlab kelgan Qobul Tursunov lavozimidan ozod etilishi va uning o‘rniga Xalq banki boshqaruvi raisi Shuhrat Atabayev yangi hokim etib tasdiqlanishi kutilayotgani haqida xabar bergandi. Ammo bu xabar o‘z tasdig‘ini topmadi.