«Paxtakor» 25-raqamli libosini Odil Ahmedovga abadiy topshirdi

Odil Ahmedovning ilk professional klubi Toshkentning «Paxtakor» jamoasi o‘z vaqtida futbolchi to‘p surgan 25-raqamli libosini abadiy unga atadi.

Foto: Tribuna.uz

Yozda milliy jamoadagi faoliyatini yakunlagan Odil Ahmedov, bugun 18 dekabr kuni futbolchilik faoliyatini tugatganini rasman e’lon qildi. Bu haqda futbolchining o‘zi uning faoliyatiga bag‘ishlangan «Odil Ahmedov: «Orzuning shonli yo‘li» kitobi taqdimot marosimida ma’lum qildi.

Tadbir davomida «Paxtakor» klubi rahbariyati Odil Ahmedovning hurmati uchun jamoaning 25-raqamini unga abadiy topshirilishini ma’lum qildi. Ahmedov 2006-2010 yillar davomida «Paxtakor» safida to‘p surib, 2011 yil «Anji»ga transfer qilingandi.

Eslatib o‘tamiz, Odil Ahmedov 2007 yildan 2021 yilning yozigacha bosh jamoamiz safida to‘p surib, O‘zbekiston JCh-2022 uchinchi saralash bosqichiga chiqa olmaganidan so‘ng milliy jamoadagi faoliyatini yakunlagan edi. 34 yoshli yarimhimoyachi Xitoy Superligasi joriy mavsumida «Tsanchjou Mayti Layons» safida 7 o‘yinda maydonga tushgandi. U faoliyati davomida «Paxtakor», «Anji», «Krasnodar», «Shanxay SIPG» klublarida ham to‘p surdi.