Rossiya chegarasini kesib o‘tishdagi cheklovlar bekor qilindi

Bugun, 15 iyuldan boshlab pandemiya sababli 2020 yil mart oyida Rossiya Federatsiyasi hududiga kirish bo‘yicha joriy qilingan barcha cheklovlar bekor qilindi.

Foto: RIA Novosti

Migratsiya agentligi xabariga ko‘ra, Rospotrebnadzor koronavirus cheklovlarini bekor qilgan bo‘lsa-da, Rossiya hukumati tomonidan quruqlikdagi chegaradan mamlakat tashqarisiga chiqishdagi cheklovlar saqlanib qolingan.

Shu bilan birga, agar COVID-19 bilan bog‘liq vaziyat yomonlashsa, cheklov choralari qayta tiklanishi mumkin.

2020 yil martda koronavirus pandemiyasi fonida Rossiyaning quruqlikdagi chegarasini kesib o‘tishga cheklovlar joriy etilgandi. Mamlakatga samolyot yoki dengiz orqali keluvchi xorijliklar uchun cheklovlar 14 iyun kuni bekor qilingandi.

15 iyuldan Belarus fuqarolari uchun Rossiyaga uchib kelganda PZR-test natijasini taqdim etish talabi ham bekor bo‘ladi. Boshqa mamlakatlar fuqarolaridan PZR-test natijasini talab qilish tartibi saqlanib qoladi.