Nukus yaqinida “itlar qabristoni” topildi

“Mehr va Oqibat” jonivorlarni himoya qilish nodavlat notijorat tashkiloti direktori nomiga nukuslik fuqarolardan hayvonlarning ommaviy tarzda, shafqatsizlarcha o‘ldirilishi bo‘yicha jamoaviy ariza tushgan.

Hayvonlar huquqlari faollarining xabar berishicha, 22–23 iyun kunlari Nukusdagi hayvonlarni tutish xizmati hududidan 150 ga yaqin it g‘oyib bo‘lgan. Hayvonlarni boqish va sug‘orish uchun kelgan ko‘ngillilarining so‘zlariga ko‘ra, xizmat xodimlari itlarning g‘oyib bo‘lishini ularning shahar tashqarisiga qo‘yib yuborilgani bilan izohlagan.

Ammo 7 iyul kuni Nukus yaqinida joylashgan poligondagi chuqurdan 100 dan ortiq o‘lik itlar (mushuklar ham bor) topilgan. Hayvonlarning og‘zi va panjalari sim bilan bog‘langan, tanalarida ko‘plab yaralar ham bo‘lgan.

“Mehr va Oqibat” tashkiloti ushbu holatni o‘rganish, aybdorlarni topib, qonunga muvofiq jazolashni so‘rab O‘zbekiston Respublikasi Ichki ishlar va Qoraqalpog‘iston Respublikasi Ichki ishlar vazirliklari hamda prokuraturaga murojaat qilgan.