Qarshi shahrida fuqaro o‘ziga benzin quyib yoqib yubordi
Holat yuzasidan Qarshi shahar prokuraturasi tomonidan tergovga qadar tekshirish harakatlari olib borilmoqda.
Ijtimoiy tarmoqlarda Qarshi shahrida yashovchi fuqaro o‘ziga benzin sepib yoqib yuborgani aks etgan videoyozuv tarqaldi.
Videoyozuvda bir guruh fuqarolar Qarshi shahrida joylashgan, terini qayta ishlovchi Qarshi Leather qo‘shma korxonasi darvozasi oldida yig‘ilib, korxonadan chiqayotgan badbo‘y hid aholi xonadonlarigacha yetib borayotganini aytib, mutasaddilardan mazkur muammoga e’tibor qaratishlarini so‘rashgan.
Videoning davomida, murojaatchi yigit taksichilik qilib ishlab topayotgan puli korxonadan tarqalayotgan badbo‘y hid tufayli sog‘ligini yo‘qotayotgan bolalariga sarflanayotganini aytadi. So‘ng korxonaning Akbar ismli rahbari uning murojaatiga javoban yigitni yo‘q qilib yuborishini aytib, tahdid qilganini bildirib, cho‘ntagida bo‘lgan benzinni ustidan quyib, yoqib yuboradi.
Boshqa murojaatchilar darhol olovni o‘chirishadi. Ammo ungacha yigit tanasining bir qismi kuyib, terisi ajralib ketadi.
Bosh prokuratura matbuot kotibining ma’lum qilishicha, mazkur holat yuzasidan Qarshi shahar prokuraturasi tomonidan tergovga qadar tekshirish harakatlari olib borilmoqda. Fuqaroning o‘zini yoqib yuborishi sabablari aniqlanmoqda.
Avvalroq, Buxoroda qurilish firmasidan pulini qaytarib ololmagan fuqaro o‘zini yoqib yuborgandi.
Mavzuga oid
10:18 / 21.07.2024
Qarshidagi korxonada yirik yong‘in sodir bo‘ldi
12:06 / 05.07.2024
Qarshida BYD Spark bilan to‘qnashdi. BYD viloyat hokimligiga tegishli bo‘lgan
17:29 / 21.02.2024
Uch viloyatda noqonuniy yer sotish holatlarining oldi olindi
11:42 / 12.02.2024