23 avgustga qadar kassa cheklarini tahrirlashga ruxsat beriladi

2022 yil o‘tgan davri uchun shu yil 23 avgustga qadar my.soliq.uz orqali kassa cheklarini tahrirlashga ruxsat beriladi.

Foto: Davlat soliq qo‘mitasi

Davlat soliq qo‘mitasi xabariga ko‘ra, bu tadbirkorlik sub’yektlari ko‘p sonli murojaatlarini inobatga olgan holda «Soliqchi-ko‘makchi» tamoyili asosida takroran amalga oshiriladi.

Xarid summasining 1 foizi qaytarilgan (keshbek) cheklar bunda mustasno.

My.soliq.uz saytidagi soliq to‘lovchining shaxsiy kabinetida «YuSh onlayn-NKM va virtual kassa ma’lumotlari» sahifasidan «Tahrirlash» bo‘limi tanlanadi.

Tahrirlashda tuzatilgan (yangilangan) ma’lumotlar kiritilishi kerak: mahsulot nomi; miqdori; summasi; QQS; mahsulotlar va xizmatlar identifikatsiya kodi (MXIK); o‘lchov birligi; komitent STIRi.

Shundan so‘ng holat yuzasidan tushuntirishni ilova qilish kifoya. QQS hisoblashda tiyin nuqta orqali kiritiladi, chek summasi o‘zgarmagan taqdirda avtomat tarzda qabul qilinadi. Yakuniy bosqich – «Yuborish» tugmasini bosish.