FVV rahbari Samarqand xalqaro aeroportida maxsus mashqlar o‘tkazdi

FVV xabariga ko‘ra, mashqlar viloyat Favqulodda vaziyatlar boshqarmasi xodimlari hamda tegishli xizmatlar ishtirokida «Aeroport negizidagi fuqaro muhofazasi tuzilmalari shaxsiy tarkibi hamda tegishli xizmatlar kuch va vositalari hamkorlikdagi harakatlari» mavzusiga bag‘ishlandi.

O‘quv mashqi g‘oyasiga ko‘ra, dastlabki bosqichida favqulodda vaziyatlarda harakat qilish tizimiga kiruvchi idora va tashkilotlar shaxsiy tarkibi, ularga biriktirilgan texnika, asbob-anjomlar shayligi saf ko‘rigi orqali ko‘zdan kechirilgan.

Shundan so‘ng, navbatdagi bosqichda avariya-qidiruv va boshqa tezkor tadbirlar, jabrlangan insonlarni xavfsiz joylarga evakuatsiya qilish, birinchi tibbiy yordam ko‘rsatish va tibbiyot muassasasiga yuborish tadbirlari bajarildi.

O‘quv mashqi yakunida Favqulodda vaziyatlar vaziri tomonidan ishtirokchilarga zarur tushuntirish va tavsiyalar berildi.

Ma’lumot uchun, 15 va 16 sentabr kunlari Samarqandda Shanhay hamkorlik tashkiloti sammiti bo‘lib o‘tadi. Unda tashkilotga a’zo mamlakatlar barcha rahbarlari ishtirok etishi kutilmoqda. Hozirgi kunda ShHT tarkibiga sakkiz davlat – Xitoy, Qozog‘iston, Qirg‘iziston, Rossiya, Tojikiston, O‘zbekiston, Hindiston va Pokiston kiradi.