Samarqandda UNESCO vakillari ishtirokida “Tinchlik daraxti” monumenti ochildi

Bugun, 18 noyabr kuni Samarqanddagi “Ipak yo‘li” xalqaro turizm va madaniy meros universitetida UNESCO bosh direktori o‘rinbosari Stefania Giannini, UNESCO’ning madaniy diplomatiya bo‘yicha maxsus elchisi Hedva Ser, Germaniya Federativ Respublikasi Iqtisodiy hamkorlik va taraqqiyot Federal vazirligining parlamenti kotibi Niyels Annen va O‘zbekiston Bosh vaziri o‘rinbosari – Turizm va madaniy meros vaziri Aziz Abduhakimov ishtirokida “Tinchlik daraxti” monumentining ochilish marosimi bo‘lib o‘tdi. 

"Tinchlik daraxti" monumenti muallifi atoqli haykaltarosh Xedva Ser bo‘lib, uning asarlari butun dunyoga mashhur. 

Ramziy ma’noga ega ushbu monument ilk bor 2008 yilda UNESCO bilan hamkorlikda Isroilda o‘rnatilgan. Keyinchalik esa Germaniya, AQSh, Ozarboyjon, Qozog‘iston, Andorra, Gretsiya, Malta va boshqa davlatlarda ham o‘rnatildi. Bugunga qadar 17 ta davlatda "Tinchlik daraxti" mavjud edi. Samarqanddagisi esa 18-"Tinchlik daraxti" bo‘ldi. Ushbu monument bronzadan yasalgan bo‘lib, og‘irligi 750 kilogrammga teng.

"Monumentni o‘rnatish jarayonlarida bir jihat e’tiborimni tortdi, — dedi Xedva Ser xonim. — Odatda, boshqa joylarda “Tinchlik daraxti”ni yaratish uchun uch oygacha vaqt sarflaganmiz. Samarqandda esa to‘rt hafta yetarli bo‘ldi".

Ma’lumot uchun, bu san’at asarining dunyoda keng e’tirof etilishi muallif haykallarida uchta yetakchi din – yahudiylik, islom va nasroniylik timsollarini uyg‘unlashtirgani bilan bog‘liq.