Amerikalik tilshunoslar 2022 yilning asosiy so‘zini tanladi

So‘nggi 12 oy ichida bu so‘zni lug‘atdan izlovchilar soni avvalgi davrga nisbatan 1740 foizga oshgan. Shunisi e’tiborga loyiqki, qiziqish deyarli har kuni saqlanib qolgan.

Merriam-Webster lug‘ati «gazlayting» so‘zini boshqa odamni psixologik manipulyatsiya qilish deb ta’riflaydi. Bu «jabrlanuvchining o‘z fikrlari, voqelik haqidagi tasavvurlari va xotiralari haqida shubha uyg‘otadi, bu ko‘pincha chalkashlikka, o‘ziga bo‘lgan ishonch va o‘zini o‘zi boshqarishning yo‘qolishiga, hissiy holatida ishonchsizlikka va manipulyatorga qaramlikka olib keladi».

Gazlayting haqida ko‘pincha kamsituvchi, zo‘ravonlikka asoslangan ishqiy munosabatlar kontekstida aytiladi. Lekin u boshqa sharoitlarda ham sodir bo‘lishi mumkin, masalan, oila a’zolari yoki do‘stlar orasida. Hatto tibbiy gazlayting haqida ham gapirish mumkin, bunda shifokor bemor tomonidan tasvirlangan alomatlarga e’tibor bermaydi yoki u hamma narsani o‘ylab topayotganini da’vo qiladi.

Lug‘at tuzuvchilari ma’lum bir so‘zning mashhurligi nima uchun bir yil davomida oshganini o‘rganmaydi - ular faqat so‘rovlar sonini tahlil qiladi va oldingi ma’lumotlar bilan solishtiradi. Shuning uchun odamlarni gazlayting so‘zi hodisa sifatida ko‘proq qiziqtiradi deb ayta olmaymiz: foydalanuvchilar so‘zning imlosini yoki undan foydalanish misollarini tekshirish uchun ham lug‘atga murojaat qilishi mumkin.