Qamchiqda Lacetti xandaqqa tushib ketdi

Qamchiq dovonida Lacetti avtomobili ishtirokida yo‘l-transport hodisasi yuz berdi. FVV qutqaruvchilari YTH oqibatlarini bartaraf etdi.

Videodan kadr

Bugun, 10 aprel kuni ertalab Toshkent – O‘sh xalqaro avtomobil yo‘lining Qamchiq dovonidan o‘tuvchi 216-kilometrida yengil avtomobil ishtirokida YTH sodir bo‘ldi.

Toshkent tomon harakatlangan Lacetti haydovchisi boshqaruvni yo‘qotishi natijasida avtomobil xandaqqa tushib ketgan. Zudlik bilan voqea joyiga FVV «Qamchiq» maxsus qidiruv, yong‘in-qutqaruv boshqarmasi xodimlari yetib kelgan. Qisqa vaqt mobaynida mashina yer yuzasiga ko‘tarilgan.

Hodisa vaqtida mashinada ikki kishi bo‘lib, ular jarohat olgan. Jarohatlanganlarga o‘z vaqtida tibbiy yordam ko‘rsatilgan.

YTH oqibatlarini bartaraf etish jarayonida dovonda avtomobillar harakati to‘xtatilmagani aytiladi.