Rossiyadan xom neft eksporti kamaymayapti - Bloomberg

Rossiyadan xom neft eksporti miqdori kamayayotgani yo‘q, hatto hukumat neft qazib olish hajmi qisqarganini e’lon qilgan bo‘lsa ham. Bloomberg xabariga ko‘ra, ikki haftadan buyon neft eksporti hajmi kuniga 3,4 million barrelga yaqinlashmoqda. 

Qayd qilinishicha, Xitoy, Hindiston va Turkiya xaridorlarining talabi neft eksporti hajmini to‘rt hafta ichida yuqori darajaga qaytishiga yordam bergan. 

Rossiya energetika vazirligi ma’lumotlariga ko‘ra, mart oyida neft qazib olish hajmi kuniga 700 ming barrelga kamaygan. Biroq, neftni dengiz orqali eksport qilish hajmi bu raqamlarni tasdiqlamayapti. So‘nggi ma’lumotlar shuni ko‘rsatadiki, neftni qayta ishlash hajmi miqdori yil boshidan buyon deyarli o‘zgarmagan va o‘tgan yilning aprel oyiga nisbatan kuniga 720 ming barrelga yuqori bo‘lgan. 

Mart oyida neft qazib olish hajmining qisqarishi allaqachon eksport raqamlarida namoyon bo‘lishi kerak edi. Ammo bu sodir bo‘lmadi. Rossiya neftni saqlash uchun yetarli miqdorda omborxonalarga ega emas. 

2022 yil 5 dekabrda Yevropa Ittifoqining Rossiyaga qarshi neft sanksiyalari kuchga kirdi. Shunga qaramay, Rossiya o‘zi uchun yangi bozorlar – Hindiston va Xitoyni «kashf etdi». 

2023 yil 17 aprel holatiga ko‘ra, Rossiya neft eksporti «urushdan oldingi» darajaga yetdi.