O‘zbekiston va Britaniya mehnat migratsiyasi sohasida hamkorlikni kengaytiradi

O‘zbekiston tashqi ishlar vazirining o‘rinbosari G‘ayrat Fozilov 7 iyun kuni Buyuk Britaniya davlat kotibining tashqi ishlar, Hamdo‘stlik masalalari va xalqaro taraqqiyot bo‘yicha parlamentar o‘rinbosari Leo Dokerti bilan muzokaralar o‘tkazdi.

TIV ma’lumotiga ko‘ra, suhbat chog‘ida siyosiy, iqtisodiy, savdo-investitsiyaviy, madaniy-gumanitar, fan-ta’lim va boshqa sohalardagi ikki tomonlama hamkorlikning keng ko‘lamli masalalari muhokama qilindi.

Bo‘lajak qo‘shma tadbirlar, jumladan, TIVlararo siyosiy maslahatlashuvlarning navbatdagi raundi bo‘yicha takliflar ko‘rib chiqildi.

Ikki mamlakat tashqi siyosat idoralari rahbarlari o‘rinbosarlari mehnat migratsiyasi sohasidagi hamkorlikni kengaytirish, ekologik yo‘nalishdagi sheriklikni mustahkamlash masalalari, shuningdek, xalqaro kun tartibining ayrim jihatlarini ham muhokama qildilar.

Bundan oldin O‘zbekiston Buyuk Britaniyadagi mehnat migrantlari soni bo‘yicha yetakchilar qatoriga kirgani xabar berilgandi.

2022 yilda Buyuk Britaniya hukumati O‘zbekiston va Qirg‘izistondan kelgan muhojirlarga 6000 dan ortiq mehnat vizasi bergan, bu ularning umumiy sonining deyarli to‘rtdan bir qismidir. Bu yil Markaziy Osiyo davlatlaridan kelgan muhojirlar soni yanada ortishi mumkin. 

Buyuk Britaniyadagi mavsumiy mehnat muhojirlari soni bo‘yicha O‘zbekiston Ukrainadan keyin ikkinchi o‘rinni egalladi. Qirg‘iziston esa to‘rtinchi o‘rinda qayd etildi.