Raneri Shomurodovning asosiy tarkibda o‘ynamayotgani sababini aytdi

Italiyada yangi mavsum start olishi arafasida Klaudio Raneri «Kalyari» hujum chizig‘idagi holat va Eldor Shomurodov haqida fikrini bildirdi.

Foto: Getty Images

Mavsumning dastlabki rasmiy o‘yini sanalmish Italiya kubogi 1/32 final bosqichi doirasidagi «Palermo»ga qarshi o‘yin oldi matbuot anjumanida Raneri o‘zbekistonlik hujumchi jamoaga moslashayotganini ma’lum qildi.

«Eldor Shomurodovda hammasi joyida, u jamoaga moslashishda davom etmoqda. Lapadula jarohat sababli safdan chiqqani sababli hozirda menda faqat bitta hujumchi bor – Pavoletti. Ya’ni, tanlov katta emas. Shomurodov tayyor, ammo u yaxshi moslashib olishi kerak. Tez orada u 100 foizga tayyor bo‘ladi», - deya italiyalik murabbiyning so‘zlarini keltirgan TuttoCagliari.

Eslatib o‘tamiz, 28 yoshli hujumchi «Komo»ga qarshi o‘rtoqlik o‘yinida (2:1) zaxiradan maydonga tushgan bo‘lsa, «Brest» bilan Fransiyadagi bahsda (1:1) zaxirada qoldirildi.

Avvalroq, kalyariliklarning o‘tgan mavsumdagi eng yaxshi goleadori Janluka Lapadula tizzasidan jarohat olib, uzoq muddatga safdan chiqqani ma’lum qilingandi.

Ma’lumot uchun, «Kalyari» - «Palermo» o‘yini 12 avgust, shanbadan yakshanbaga o‘tar kechasi soat 00:15da boshlanadi.

Tayyorlagan: Усмон Ибодов

#Eldor Shomurodov #Kalyari