Италияда янги мавсум старт олиши арафасида Клаудио Раньери «Кальяри» ҳужум чизиғидаги ҳолат ва Элдор Шомуродов ҳақида фикрини билдирди.
Мавсумнинг дастлабки расмий ўйини саналмиш Италия кубоги 1/32 финал босқичи доирасидаги «Палермо»га қарши ўйин олди матбуот анжуманида Раньери ўзбекистонлик ҳужумчи жамоага мослашаётганини маълум қилди.
«Элдор Шомуродовда ҳаммаси жойида, у жамоага мослашишда давом этмоқда. Лападула жароҳат сабабли сафдан чиққани сабабли ҳозирда менда фақат битта ҳужумчи бор – Паволетти. Яъни, танлов катта эмас. Шомуродов тайёр, аммо у яхши мослашиб олиши керак. Тез орада у 100 фоизга тайёр бўлади», - дея италиялик мураббийнинг сўзларини келтирган TuttoCagliari.
Эслатиб ўтамиз, 28 ёшли ҳужумчи «Комо»га қарши ўртоқлик ўйинида (2:1) захирадан майдонга тушган бўлса, «Брест» билан Франциядаги баҳсда (1:1) захирада қолдирилди.
Аввалроқ, кальяриликларнинг ўтган мавсумдаги энг яхши голеадори Жанлука Лападула тиззасидан жароҳат олиб, узоқ муддатга сафдан чиққани маълум қилинганди.
Маълумот учун, «Кальяри» - «Палермо» ўйини 12 август, шанбадан якшанбага ўтар кечаси соат 00:15да бошланади.
