Rossiyadagi o‘zbekistonlik mehnat migrantlari ogohlikka chaqirildi

Tashqi mehnat migratsiyasi agentligi Rossiyadagi o‘zbekistonlik mehnat migrantlarini ogohlikka chaqirdi.

«So‘nggi kunlarda Rossiya va Ukraina o‘rtasidagi harbiy harakatlar hamda ushbu davlatlar hududida bo‘lib turgan O‘zbekiston fuqarolari bilan bog‘liq turli xabarlar tarqalmoqda. Shu munosabat bilan, Rossiya hududida vaqtincha mehnat faoliyatini amalga oshirayotgan O‘zbekiston fuqarolaridan Rossiya va Ukraina o‘rtasidagi ziddiyatli hududlarga ishlash maqsadida bormaslikni, harbiy harakatlarda ishtirok etmaslikni so‘raymiz», deyiladi xabarda.

Agentlik O‘zbekiston Jinoyat kodeksida chet davlatlarning harbiy xizmatiga, xavfsizlik, politsiya, harbiy adliya organlari yoki shunga o‘xshash boshqa organlariga xizmatga yollanish 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish bilan jazolanishi ko‘zda tutilganini eslatdi.

Avvalroq, Rossiyaning bir qancha shaharlarida Rossiya armiyasiga xizmatga qabul qilish to‘g‘risida o‘zbek, tojik va qozoq tilidagi e’lonlar paydo bo‘lgandi. Xizmatga borishni istaganlarga pul mukofoti, Rossiya fuqaroligini soddalashtirilgan tartibda olish va’da qilingan.