Shols: Germaniya NATO va Rossiya o‘rtasidagi keskinlashuvning oldini olmoqchi

Germaniya federal kansleri Olaf Sholsga ko‘ra, Germaniya hukumati Kiyevni qo‘llab-quvvatlab, NATOning Rossiya bilan munosabatlarini keskinlashtirmaslikka harakat qilmoqda. «Biz Ukrainani kerakli darajada qo‘llab-quvvatlaymiz va shu bilan birga, barcha qarorlarimiz Rossiya va NATO o‘rtasidagi urushning oldini olishga qaratilgan», — dedi u 24 iyul, chorshanba kuni Berlindagi matbuot anjumanida.

Shunga asoslanib, Germaniya Ukrainaga qanday turdagi qurollarni topshirishi mumkinligini va qaysi birini bera olmasligini «aniq ko‘rsatadi». Shuningdek, Shols Kiyevga Rossiya Federatsiyasi hududida taqdim etilgan qurollardan faqat Xarkiv viloyati bilan chegaradosh hududlarda foydalanishga ruxsat berganini qayd etdi.

GFR kansleri Germaniyada Amerika raketalarini joylashtirish to‘g‘risida 

Shu bilan birga, u Germaniya hududida Amerikaning uzoq masofali raketalarini joylashtirish qarorini himoya qilib, havo mudofaasini kuchaytirish zarurligiga ishora qildi. Ushbu holat Germaniyaning milliy xavfsizlik strategiyasiga kiritilgan, dedi u. «Bu urushning oldini olishga xizmat qiladi», deya qo‘shimcha qildi Shols. 

Amerikaning uzoq masofali raketalarini joylashtirishni to‘xtatish uchun Moskva nima qilishi kerakligi haqidagi savolga u: «Rossiya Ukrainadagi urushni to‘xtatishi kerak», deb javob berdi. 

Shols TAURUS raketalarini Kiyevga topshirishdan bosh tortdi 

Germaniya kansleri Kiyev so‘rovlariga qaramay, ko‘p oylardan beri TAURUS uzoq masofali tizimlarini Ukrainaga o‘tkazishdan bosh tortmoqda. «Juda uzoq masofali qurollarni yetkazib berish va ularni qanday boshqarish haqida o‘ylamaslik mumkin emas, nazorat faqat nemis askarlari ishtirokida amalga oshishi mumkin, bu esa mutlaqo yuz bermaydi», degandi u mart oyida.

Shols TAURUS raketalarini Ukrainaga topshirishdan bosh tortishini Germaniya Rossiyaning Ukrainaga qarshi urushiga jalb qilinishidan tashvishlanishi bilan izohladi. Shu bilan birga, Germaniya hukumati rahbari yaqinda Kiyevga yanada qat’iy yordam berishni qo‘llab-quvvatlashini bir necha bor bildirgan. Yevropadagi chegaralar boshqa hech qachon kuch bilan o‘zgartirilmasligi kerak va Germaniya buning oldini olish uchun o‘z vazifasini bajarishda davom etadi, dedi u.