Germaniya: Xitoy Tinch okeanida beqarorlik yaratmoqda

Germaniya mudofaa vaziri Boris Pistorius fikricha, Xitoy siyosati Osiyo-Tinch okeani mintaqasida beqarorlik yaratmoqda. Bu haqda siyosatchi seshanba kuni Amerika Qo‘shma Shtatlari boshchiligidagi harbiy-dengiz kuchlarining Havayida o‘tkazilayotgan mashg‘ulotlariga tashrifi chog‘ida aytib o‘tdi, deb xabar beradi DPA agentligi 31 iyul, chorshanba kuni.

Tinch okeanidagi nemis dengizchilari

Havayida RIMPAC (Rim of Pacific, «Tinch okeani chegarasi») dunyodagi eng yirik harbiy-dengiz mashqlari yakunlanmoqda. Ular AQShning Tinch okeani qo‘mondonligi tomonidan o‘tkazilyapti. Germaniyadan harbiy-dengiz kuchlarining Baden-Württemberg fregati va Frankfurt-Main jangovar yordam kemasi manevrlarda ishtirok etmoqda.

Pistorius nemis dengizchilari oldiga tashrif buyurdi va 1941 yil dekabrida Yaponiya hujumida halok bo‘lgan amerikalik askarlarga bag‘ishlangan Perl-Harbor yodgorligida nutq so‘zladi. Uning so‘zlariga ko‘ra, Germaniya Hind-Tinch okeani mintaqasida xalqaro huquq va erkinlikni himoya qilishda katta rol o‘ynaydi. Yevropaga u yerda barqarorlik va xavfsizlik kerak, deydi siyosatchi. «Birini ikkinchisisiz tasavvur qilib bo‘lmaydi», dedi u.

Xitoyga qarshi ayblovlar

Germaniya harbiy departamenti rahbarining qo‘shimcha qilishicha, Xitoy o‘z manfaatlarini «mintaqada beqarorlik va noaniqlikka olib keladigan» tarzda ilgari surmoqda.

«Biz dunyodagi uchinchi yirik iqtisodiyotmiz va shuning uchun ko‘pchilik bilan mas’uliyatni baham ko‘ramiz», dedi Pistorius. Uning so‘zlariga ko‘ra, bu qoidalarga asoslangan dunyo tartibini himoya qilishni ta’minlash uchun sheriklar bilan ishlashni anglatadi. «Hech kimga qarshi emas, oddiy va qat’iylik bilan tushuntiramiz: biz dengizlar, navigatsiya erkinligi va qoidalarga asoslangan xalqaro tartibning qadrini bilamiz», dedi vazir. «Biz o‘zimizni ortiqcha baholamaymiz, lekin biz bu mintaqada hamkormiz va bizni shunday qabul qilishadi va qadrlashadi», deya qo‘shimcha qildi u.