GFR davlat xizmatchilari va infratuzilma xodimlarini tekshirishni kuchaytiradi

Germaniya hukumati hukumat idoralari va muhim infratuzilmani josuslik va diversiyalardan himoya qilishni kuchaytirishga qaratilgan qonun loyihasini qabul qildi. Bu xodimlarni yanada samarali tekshirishni, jumladan, ijtimoiy tarmoqlardagi bayonotlarni elakdan o‘tkazishni ham o‘z ichiga oladi, deb xabar qildi Germaniya Ichki ishlar vazirligi 9 oktyabr, chorshanba kuni.

Konstitutsiyani himoya qilish idoralari Germaniya xavfsizligi uchun muhim bo‘lgan davlat idoralari va kompaniyalar xodimlarining konstitutsiyaga zid bayonotlarini aniqlash uchun internetda ko‘proq tekshiruvlar o‘tkazishi mumkin bo‘ladi.

Konstitutsiyaga sodiqlik va xorijiy maxsus xizmatlar uchun zaifliklarni aniqlash

Internetda va ayniqsa, ijtimoiy tarmoqlarda «konstitutsiyaning ishonchliligini har tomonlama baholash imkonini beruvchi muhim ma’lumotlarni ko‘plab uchratish mumkin», dedi hukumat rasmiy vakili Shteffen Xebeshtrayt. Bundan tashqari, shu yo‘l bilan davlat xizmatchilarining xorijiy maxsus xizmatlar oldida ehtimoliy zaifligini aniqlash imkoni mavjud, dedi u.

Majburiy kengaytirilgan tekshiruvlar davlat xavfsizligi uchun muhim bo‘lgan sohalardagi xodimlarga, shu jumladan elektr ta’minoti kompaniyalari va federal hokimiyat organlari — federal vazirliklar, federal kansler idorasi va federal prezident idorasiga tegishli.

GFR hukumati xavfsizlikka xatarlarni kamaytirish niyatida

Shunday qilib, federal hukumat xavfsizlikka yangi tahdidlar munosabati bilan choralar ko‘rmoqda, deb ta’kidladi Ichki ishlar vazirligi. Idora rahbari Nensi Fezerning tushuntirishicha, josuslik va diversiyalar orqali demokratiyaga tahdid «yangi daraja»ga ko‘tarilgan. «Rossiyaning Yevropadagi tajovuzkorligi xavfsizlik bilan bog‘liq vaziyatni tubdan o‘zgartirdi. Bundan tashqari, Germaniya boshqa davlatlar maxsus xizmatlarining diqqat markazida», — deya qo‘shimcha qildi u.

Xavfsizlikka xatarlarni kamaytirish uchun Germaniya davlat boshqaruvi va muhim infratuzilmadagi nozik vazifalar va maxfiy ma’lumotlar kimga ishonib topshirilganini sinchiklab tekshiradi, dedi vazir.