O‘zbekiston va Rossiya Kaspiy dengizi orqali yangi yo‘nalishlardan foydalanmoqchi

Tomonlar temiryo‘l infratuzilmasini qurish bo‘yicha o‘zaro anglashuv memorandumini imzoladi.

Foto: Transport vazirligi axborot xizmati

Moskvada «Transport haftaligi – 2024» tadbiri o‘z faoliyatini boshladi. Rossiya Federatsiyasi Transport vazirligi tomonidan 17-marotaba tashkil etilgan tadbir doirasida «Transport-2024» forumi va ko‘rgazmasi ham o‘tkazilmoqda.

«Transport haftaligi – 2024» doirasida O‘zbekiston transport vaziri Ilhom Mahkamov hamda Rossiya transport vaziri Roman Starovoyt o‘rtasida ikki tomonlama uchrashuv bo‘lib o‘tdi.

Tomonlar o‘zaro hamkorlikda temiryo‘l infratuzilma loyihalarini amalga oshirish, shuningdek, Kaspiy dengizi orqali yangi yo‘nalishlardan foydalanish masalalarini muhokama etishdi.

Uchrashuv yakunida tomonlar vazirliklar o‘rtasida temiryo‘l infratuzilmasini qurish bo‘yicha hamkorlikni tashkil etish yuzasidan o‘zaro anglashuv memorandumini imzoladilar.

Tayyorlagan: Отабек Матназаров

#Rossiya #Kaspiy