Qrim «hokimiyati» Ukraina Forosga zarba berganini ma’lum qildi

Qo‘shib olingan Qrimning Rossiya tomonidan tayinlangan «rahbari» Sergey Aksyonov 21 sentabr, yakshanba kuni kechqurun yarim orolning janubiy kurort sohilidagi "Foros" sanatoriysiga Ukraina dronlari tomonidan hujum uyushtirilgani haqida ma’lum qildi. Aksyonovning so‘zlariga ko‘ra, hujum oqibatida 3 kishi halok bo‘lgan, 15 ga yaqin kishi jarohatlangan. Foros posyolkasidagi maktab binosi va sanatoriy hududidagi bir qancha obektlar ham zarar ko‘rgan, ammo rasmiy bu qaysi biri ekanini aniqlamagan.

Rossiya Mudofaa vazirligi boshqa ma’lumotlarni taqdim etdi: unga ko‘ra, hujumda ikki tinch fuqaro halok bo‘lgan, 15 kishi turli darajada jarohatlangan. Vazirlikning ta’kidlashicha, zarba portlovchi jangovar kallaklarni olib yurgan dronlar tomonidan amalga oshirilgan.

Avvalroq Rossiya Mudofaa vazirligi Ukrainaning 22 ta samolyot tipidagi uchuvchisiz uchog‘i Moskva vaqti bilan soat 16:00 dan soat 20:00 gacha Qora dengiz uzra urib tushirilganini, yana uchtasi Qrim yarim orolining o‘zida urib tushirilganini ma’lum qilgandi.

Rasmiy ravishda Kiyev bu ma’lumotga hozircha izoh bermagan.