Namanganda JAC pikapi yonib ketdi

Harakatlanib ketayotgan mashinada yong‘in chiqqan va u butkul yonib ketgan.

26 noyabr kuni Pop tumani Kaltabozor ko‘chasida harakatlanib ketayotgan JAC pikapida yong‘in sodir bo‘ldi. Holat bo‘yicha viloyat Favqulodda vaziyatlar boshqarmasi rasmiy munosabat bildirdi.

Ma’lum bo‘lishicha, soat 10:48 da mashinada yong‘in chiqqani haqida tuman FVBga xabar kelib tushgan. O‘t o‘chiruvchilar 10 daqiqada yong‘in joyiga yetib borib, 5 daqiqada uni bartaraf qilgan.

Yong‘in natijasida avtomobil to‘liq yonib ketgan. Haydovchi va avtomobilga tegishli bo‘lgan xujjatlar ham yonib zararlangan.

Ta’kidlanishicha, yong‘indan hech kim jarohatlanmagan. Hozirda tergovga qadar surishtiruv ishlari olib borilmoqda.