Viktor Orban Vladimir Putinga Ukraina tufayli qo‘ng‘iroq qildi

Rossiya prezidenti Vladimir Putin Vengriya bosh vaziri Viktor Orban bilan telefon orqali suhbatlashdi, deb xabar qildi tomonlar 11 dekabr, chorshanba kuni.

«Bugun ertalab men prezident Putin bilan bir soat telefon orqali suhbatlashdim. Hozir Rossiya va Ukraina o‘rtasidagi urushdagi eng xavfli haftalardir, biz o‘t ochishni to‘xtatish va tinchlik muzokaralarini targ‘ib qilish uchun barcha mumkin bo‘lgan diplomatik choralarni ko‘rmoqdamiz», deb yozdi Orban ijtimoiy tarmoqlarda.

Kreml Putinning Orban bilan suhbatlashganini tasdiqlab, «ikki tomonlama savdo-iqtisodiy hamkorlikning bir qator dolzarb masalalari» muhokama qilinganini va «Ukraina masalalari bo‘yicha atroflicha fikr almashilganini» bildirdi. «Viktor Orban inqirozni siyosiy va diplomatik yo‘l bilan hal qilish yo‘llarini, shu jumladan, qator G‘arb yetakchilari bilan aloqalarini hisobga olgan holda birgalikda izlashga ko‘maklashishdan manfaatdorligini bildirdi», — deya ma’lum qildi Kreml.

Kreml veb-saytida ta’kidlanganidek, Putin «Ukraina atrofidagi vaziyatning hozirgi rivojlanishiga fundamental baho berdi».

Vengriya Rossiyaning Ukrainada keng ko‘lamli urushi boshlanganidan keyin ham Kreml bilan aloqalarini saqlab kelayotgan Yevropa Ittifoqining kam sonli davlatlaridan biri. Viktor Orban bir necha bor Yevropa Ittifoqining Rossiyaga qarshi sanksiyalari va Ukrainaga harbiy yordam ko‘rsatishiga qarshi chiqqan.