Shahzoda Endryuning ishonchli vakili Xitoy foydasiga josuslikda gumonlanmoqda

Buyuk Britaniya qiroli Charlz III ning ukasi shahzoda Endryuning ishonchli odami Xitoy foydasiga josuslikda gumon qilinib, mamlakatga kirishi taqiqlandi. 2023 yilda qabul qilingan ushbu qaror 13 dekabr, juma kuni London sudi tomonidan tasdiqlangan.

Sud qarorida aytilishicha, Endryu nomi oshkor etilmagan Xitoy fuqarosi bilan shunchalik yaqin munosabatda bo‘lganki, uni tug‘ilgan kuniga taklif qilgan. Britaniya rasmiylarining fikricha, josuslikda gumon qilinayotgan shaxs Xitoy Kommunistik partiyasining xorijiy tashkilotlarga ta’sir o‘tkazgan bo‘limi bo‘lgan Yagona front bo‘linmasi (AQSh tomonidan 2020 yilda «xorijiy missiya» sifatida tasniflangan) nomidan ishlagan bo‘lishi mumkin. Xususan, Endryu bilan aloqador bo‘lgan ismi oshkor etilmagan tadbirkor «Xitoyning yuqori martabali amaldorlari va Britaniyaning taniqli arboblari o‘rtasida Xitoy davlati tomonidan siyosiy aralashuv maqsadida foydalanishi mumkin bo‘lgan munosabatlarni rivojlantirish qobiliyatiga ega edi», deyiladi sud qarorida.

Shahzoda Endryu, o‘z navbatida, gumon qilinayotgan Xitoy fuqarosiga nisbatan shubhalar paydo bo‘lishi bilanoq u bilan barcha aloqalarni to‘xtatganini aytdi. Uning idorasi bayonotida, shuningdek, u bilan «rasmiy kanallar orqali» uchrashgani va «nozik narsalarni» muhokama qilmagani bildirildi.

Shahzoda Endryuning Xitoy foydasiga josuslikda gumon qilingan ishonchli odami haqida nimalar ma’lum?

London Pekin foydasiga josuslikda gumon qilayotgan Xitoy fuqarosi 50 yoshda. U 2002 yilda talaba sifatida Buyuk Britaniyaga ko‘chib o‘tgan va Britaniya kompaniyalariga Xitoydagi faoliyati bo‘yicha maslahat beruvchi biznesni yo‘lga qo‘yishdan oldin York universitetida magistraturani tamomlagan. 2013 yilda u mamlakatda cheksiz muddatga yashash va ishlash huquqini oldi va Buyuk Britaniyani o‘zining ikkinchi vatani deb atagan.

2021 yil 6 noyabrda u mamlakatga kirayotganda to‘xtatildi va uning telefoni va boshqa qurilmalari ko‘zdan kechirildi, ularda Endryuning katta maslahatchisining shahzoda nomidan harakat qilish vakolatiga ega ekanligini tasdiqlovchi xati topildi.