O‘zbekiston va Ozarboyjon prezidentlari telefon orqali suhbatlashdi

Mirziyoyev va Aliyev oliy darajadagi kelishuvlarni amalga oshirish doirasida O‘zbekiston-Ozarboyjon do‘stlik va ittifoqchilik munosabatlarini yanada kengaytirish va mustahkamlashning dolzarb masalalarini ko‘rib chiqdilar.

Prezident Shavkat Mirziyoyev 24 dekabr kuni bo‘lib o‘tgan telefon orqali muloqotda Ozarboyjon Respublikasi prezidenti Ilhom Aliyevni tavallud kuni bilan samimiy muborakbod etdi.

Davlat rahbari Ozarboyjon yetakchisining mamlakat mustaqilligini mustahkamlash, hududiy yaxlitligini tiklash, barqaror taraqqiyotini ta’minlash va xalqaro nufuzini yuksaltirishdagi tarixiy rolini alohida ta’kidladi.

Prezidentlar oliy darajadagi kelishuvlarni amalga oshirish doirasida O‘zbekiston-Ozarboyjon do‘stlik va ittifoqchilik munosabatlarini yanada kengaytirish va mustahkamlashning dolzarb masalalarini ko‘rib chiqdilar.

Joriy ikkitomonlama hamkorlikni jadal rivojlantirish yilida birgalikda qilingan ishlar samarali bo‘lgani katta mamnuniyat bilan qayd etildi.

O‘zaro tovar ayirboshlash hajmi yuqori sur’atda o‘sib bormoqda, avtomobilsozlik, to‘qimachilik, elektrotexnika, qishloq xo‘jaligi, turizm va boshqa tarmoqlarda kooperatsiya loyihalari faol bosqichda. Madaniy-gumanitar almashinuvning tadbirlarga boy dasturi amalga oshirilmoqda.

O‘zbekiston va Ozarboyjon rahbarlari xalqaro kun tartibi yuzasidan ham fikr almashdilar, bo‘lajak tadbirlar rejasini ko‘rib chiqdilar.

Tayyorlagan: Сардор Юсупов

#Ilhom Aliyev #Shavkat Mirziyoyev #Ozarboyjon