«Krokus»dagi terakt bo‘yicha tergov yakunlandi

Moskvadagi «Krokus Siti Xoll» konsert zalida sodir etilgan terakt bo‘yicha tergov nihoyasiga yetdi. Bu haqda ayblanuvchilardan birining advokati Oleg Vlasov ma’lum qildi, deb xabar berdi TASS.

«Ish bo‘yicha tergov harakatlari yakunlandi, tomonlar uning materiallari bilan tanishishni boshladi. Qonunga ko‘ra, jabrlanuvchilar bu ishni birinchi bo‘lib amalga oshiradi va ularning soni mingga yaqin. Demak, ish tez orada sudga o‘tkazilishi dargumon», dedi himoyachi.

Sudlanuvchilarning advokatlari terakt bo‘yicha ish mart oyi oxirida sudga topshirilishini kutmoqda.

Moskva viloyatidagi «Krokus Siti Xoll» konsert zaliga hujum 2024 yil 22 mart kuni sodir bo‘ldi. Tojikiston fuqarolari bo‘lgan to‘rt nafar qurollangan shaxs konsertga kelgan odamlarga qarata o‘q uzdi, auditoriyaga o‘t qo‘ydi, so‘ngra binoni tark etib, mashinada qochib ketdi.

Terakt oqibatida 145 kishi halok bo‘ldi, bir necha yuz kishi jarohatlandi. Ushbu hujum zamonaviy Rossiya tarixidagi eng yirik teraktlardan biriga aylandi.

Hujum uchun javobgarlikni IShIDning Afg‘onistondagi bo‘limi hisoblangan «Xuroson Viloyati» guruhi o‘z zimmasiga oldi.

Huquq-tartibot idoralari hujumni sodir etish va uyushtirishda yordam berishda gumon qilingan 20 ga yaqin shaxsni qo‘lga oldi, ularning aksariyati Tojikiston fuqarolari.

Keyinroq Rossiya Tergov qo‘mitasi rahbari Aleksandr Bastrikin bu ish bo‘yicha 27 nafar ayblanuvchi borligini, bundan tashqari, terakt oqibatida 146 kishi halok bo‘lgani va yana 551 kishi jarohatlanganini ma’lum qildi. 

Teraktdan so‘ng Rossiya hududida migrantlar uchun ish va yashash rejimi kuchaytirildi.