Norvegiyada AQSh dipmissiyasi yonidagi teraktda gumon qilinganlar qo‘lga olindi

Norvegiya politsiyasi Oslodagi AQSh elchixonasi kirish qismi yonidagi portlashga aloqadorlikda gumon qilinayotgan uch nafar aka-ukaning qo‘lga olingani haqida xabar qildi. Qo‘lga olinganlar — yoshi 20 dan 29 gacha bo‘lgan, asli iroqlik Norvegiya fuqarolari bo‘lib, ular avval politsiyaga ma’lum bo‘lmagan, dedi Oslodagi huquqni muhofaza qiluvchi organlar 11 mart, chorshanba kuni.

Aka-ukalar terrorchilik harakatini sodir etganlikda gumon qilinmoqda, dedi bosh tergovchi Kristian Xatlo. Tergov fikricha, ular odamlarni o‘ldirish yoki katta miqdorda zarar yetkazish maqsadida kuchli portlovchi qurilmani ishga tushirgan.

“Biz hali ham bir nechta gipotezani ko‘rib chiqyapmiz. Ulardan biri — tanlangan nishon sababli bu davlat tuzilmasi tomonidan berilgan buyruq bo‘lishi mumkinmi, degan masala”, dedi Xatlo. U, shuningdek, yana qo‘shimcha qo‘lga olishlar bo‘lishi mumkinligini ham istisno qilmadi. Norvegiya politsiyasi boshqalar qatorida AQShning FTB idorasi va Interpol bilan hamkorlik qilmoqda, deb xabar berdi Norvegiyaning NRK mediakompaniyasi.

Norvegiyadagi AQSh elchixonasi konsullik bo‘limi kirish joylaridan biri yonidagi portlash 8 martga o‘tar kechasi sodir bo‘lgan, hech kim jabrlanmagan. Politsiya portlash sabablari haqida tafsilot bermadi, faqat “portlovchi qurilma” ishlatilganini ma’lum qildi. AFP agentligi qayd etishicha, konsullik bo‘limi kirish qismi oldidagi qor ustida shisha bo‘laklari ko‘ringan, qalin shisha eshikda yoriqlar paydo bo‘lgan, simlarda osilib turgan chiroqlar va eshik tagida yer ustida, ehtimol, portlashdan qolgan qora izlar ham kuzatilgan.