Saudiya Arabistonida og‘ir kasallikka chalingan o‘zbekistonlik vatanga qaytarildi

Bosh konsulxona sa’y-harakatlari bilan Saudiya Arabistonining Makka shahrida insult kasalligini boshidan o‘tkazgan o‘zbekistonlik vatanga qaytarildi.

Bosh konsulxona ma’lumotiga ko‘ra, Umra amallarini ado etish maqsadida Saudiya Arabistoniga borgan fuqaro B.M. insultga chalingani sababli King Abdulaziz Hospital kasalxonasiga davolash maqsadida yotqizilgan.

Bosh konsulxona qilingan murojaat asosida bemorning O‘zbekistonga qaytishi bilan bog‘liq barcha hujjatlarini rasmiylashtirishda amaliy yordam ko‘rsatilgan.

Fuqaro 27 fevral kuni O‘zbekistonga qaytib kelgan va u davolanishni Toshkentda davom ettirmoqda.

Avvalroq Tailandda og‘ir tan jarohati olgan O‘zbekiston fuqarosi vatanga qaytarilgani to‘g‘risida xabar berilgandi. Ushbu fuqaro Pattayada mehmonxonaning 6-qavatidan tushib ketib, og‘ir jarohat olgan. Tibbiyot muassasasida davolanish davomida u 352 ming bat qarzdor bo‘lib qolgan edi.