WSJ: Xitoy harbiy potensialini oshirish uchun okean tubini faol o‘rganmoqda

Xitoy o‘zining hududiy suvlaridan tashqaridagi okean tublarini o‘rganishni sezilarli darajada faollashtirdi. Bu haqda ekspert va olimlar o‘rtasida o‘tkazilgan so‘rov natijasiga tayanib, The Wall Street Journal (WSJ) xabar berdi.

Xitoyga tegishli kemalar Tailand, Indoneziya, Malayziya, Shri-Lanka va Hindiston sohillari yaqinlarida payqalgan.

Ma’lum qilinishicha, XXR fuqarolik kemalari okean tubining relefi, oqim kuchi va yo‘nalishi, suv yuzasidagi harorat va zichlik, shuningdek, mikroelementlar tarkibini o‘rganmoqda. Ayrim ekspertlarning hisoblashicha, shu orqali xitoyliklar okeandagi foydali qazilmalar istiqbolini aniqlashga urinmoqda, boshqalar esa ushbu ma’lumotlar harbiy yoki razvedka maqsadlarida foydalanilishi mumkinligidan xavotirda.

«Agar ushbu ma’lumotlar Xitoy harbiylari uchun foydali bo‘lsa, ular bundan foydalanish imkoniyatini qo‘lga kiritadi. U yerda hech qanday cheklov yo‘q», — deydi Strategik va xalqaro tadqiqotlar markazi katta ilmiy xodimi Metyu Funayole.

Bundan tashqari, dengiz oqimlari va suv zichligi to‘g‘risidagi ma’lumotlar suvosti kemalarining maksimal darajada ovozsiz harakatlanishi uchun tegishli marshrutlarni aniqlashda yordam berishi mumkin.

«Okeanning turli qismlarida tovush turlicha tarqaladi. Agar siz suv tubidagi konturlarni tushunsangiz, bu muhim ma’lumotga aylanishi mumkin», — deydi Yyel universiteti katta ilmiy xodimi Piter Datton.