Turkiyada Rutube bloklandi, hosting esa buni inkor etmoqda

Mart oyi boshlarida Turkiyadan X ijtimoiy tarmog‘idagi bir nechta foydalanuvchi ham saytga kirish imkoni yo‘qligini bildirgan, deb yozadi «Mediazona».

RIA Novostining ma’lum qilishicha, saytga kirish Turkiyadagi turli mobil operatorlar va uy internet provayderlari orqali cheklangan.

TASS xabar berishicha, VPN orqali foydalanilganda Rutube Turkiya hududida odatdagi tartibda ishlaydi. VPN’siz holda saytga kirishga uringanda esa quyidagi xabar chiqadi: «Ulanish himoyalanmagan. Balki firibgarlar rutube.ru sayti orqali sizning ma’lumotlaringizni — parollar, xabarlar va kredit kartalari ma’lumotlarini o‘g‘irlashga urinayotgandir». Xavfsiz sahifaga o‘tishda esa saytga Turkiya regulyatori tomonidan blok qo‘yilgani haqida ma’lumot beriladi.

Bloklash haqidagi ma’lumot berilgan plashkada Rutube’ga kirish cheklangani sababi — saytdagi qimor o‘yinlarining reklama qilingani ekani aytiladi. «Noqonuniy bukmekerlik terrorizmni moliyalashtirish uchun foydalanilishi mumkin. Noqonuniy stavkalarga pul yuborish orqali o‘zingizni jinoiy holatga tushirib qo‘yishingiz mumkin», — deya «Mediazona» mazkur bildiruvni tarjima qilgan.

Rutube matbuot xizmati RT’ga bildirishicha, servis Turkiyada o‘z faoliyatini davom ettirmoqda va bloklash haqidagi ma’lumotlar «haqiqatga to‘g‘ri kelmaydi». Kompaniya ta’kidlashicha, «qiyinchiliklar ehtimolan mahalliy provayderlar ishlash xususiyati bilan bog‘liq bo‘lishi mumkin».