Forbes: Rossiyada dollarli milliarderlar soni rekord darajaga yetdi

Rossiyada so‘nggi bir yilda dollarli milliarderlar soni va ularning umumiy boyligi sezilarli darajada oshdi. Amerikaning Forbes jurnalining 1 aprel, seshanba kuni e’lon qilingan yangilangan ro‘yxatiga ko‘ra, ikkala ko‘rsatkich ham rekord darajaga yetdi. 

Rossiya milliarderlar soni bo‘yicha dunyoda beshinchi o‘rinda. Ro‘yxatda jami 3028 kishi bor. Eng ko‘p vakillar AQSh (902), Xitoy (516), Hindiston (205) va Germaniyadan (171). Rossiya dollarli milliarderlar soni bo‘yicha beshinchi o‘rinni egallab turibdi.

Forbes'ning ingliz tilidagi versiyasiga ko‘ra, Rossiya fuqarolari orasida dollarli milliarderlar soni bir yil ichida 120 dan 140 kishiga, ularning umumiy boyligi esa 537 milliard dollardan 580 milliard dollarga oshgan. Shu bilan birga, Forbes'ning rus tilidagi versiyasida yozilishicha, 2025 yilda Rossiya Federatsiyasida dollarli milliarderlar soni 146 kishini, ularning umumiy boyligi 625,5 milliard dollarni tashkil qilgan. Qayd etilishicha, eng boy 20 nafar rossiyalikdan 14 nafari G‘arb sanksiyalariga duchor bo‘lgan.

Forbes Russia ma’lumotlariga ko‘ra, milliarderlar ro‘yxatidagi rossiyaliklar soni va ularning umumiy boyligi 2022 yilda, Ukrainada urush boshlanganidan keyin keskin kamaydi. O‘shandan beri ikkala ko‘rsatkich ham o‘sdi va 2021 yilda o‘rnatilgan avvalgi rekordni ortda qoldirdi. Forbes o‘z ro‘yxatini 1987 yildan beri yuritib keladi. 

«Lukoyl» asoschisi Vagit Alekperov ketma-ket ikkinchi yil Forbes talqini bo‘yicha 28,7 milliard dollar bilan eng boy rossiyalik deb tan olinmoqda. Undan keyin - «Severstal» va «Novatek» kompaniyalari rahbarlari Aleksey Mordashov (28,6 milliard) va Leonid Mixelson (28,4 milliard) oilalari bilan.

Forbes kartochkalariga ko‘ra, Rossiya fuqaroligiga ega bo‘lgan ko‘plab milliarderlar boshqa mamlakatlarda yashaydi. Masalan, Andrey Melnichenko — BAAda, Mixail Proxorov — Shveytsariyada, Petr Aven — Latviyada, Yelena Baturina — Buyuk Britaniyada.