Xitoy va Yevropa Ittifoqi AQSh yangi boj tariflariga norozilik bildirdi

Xitoy AQSh prezidenti Donald Tramp tomonidan joriy qilingan yangi boj tariflariga norozilik bildirdi.

Xitoy Savdo vazirligi bayonotida Pekin bu qarorga qat’iyan rozi emasligini va o‘z huquq va manfaatlarini himoya qilish uchun qat’iy qarshi choralar ko‘rish niyatida ekanligi ta’kidlanadi.

«Qo‘shma Shtatlarda «o‘zaro tariflar» deb ataladigan siyosat sub’yektiv va bir tomonlama baholashga asoslangan va xalqaro savdo qoidalariga mos kelmaydi. Bu bir tomonlama iqtisodiy majburlash namunasidir. Bunday harakatlar nafaqat Qo‘shma Shtatlarga zarar yetkazadi, balki jahon iqtisodiyoti rivojlanishi va ta’minot zanjirlari barqarorligiga tahdid soladi», deyiladi bayonotda.

Bundan tashqari, Xitoy tomoni Amerika Qo‘shma Shtatlari «o‘zaro» bahonasida barcha savdo hamkorlari uchun tariflarni oshirganini va shu bilan ko‘p yillik savdo muzokaralari davomida erishilgan manfaatlar muvozanatini e’tiborsiz qoldirganini ta’kidladi.

«Tarix bojlarni oshirish Amerika muammolarini hal qilmasligini isbotlaydi. Savdo urushlarida g‘oliblar yo‘q, proteksionizm esa yechim emas», deyiladi bayonotda.

Xitoy Qo‘shma Shtatlarni bir tomonlama tarif choralarini bekor qilishga va savdo hamkorlari bilan kelishmovchiliklarni teng muloqot orqali hal qilishga chaqirdi.

AQSh Xitoy tovarlariga 34 foizlik boj joriy qildi. AQSh prezidenti Donald Tramp 4 apreldan boshlab boshqa davlatlarga «o‘zaro tariflar» qo‘llashni boshlashini ma’lum qildi. Asosiy tarif stavkasi 10 foizdan ortiq bo‘ladi, qo‘shimcha bojlar esa barcha cheklovlar, shuningdek, nohaq raqobat ko‘rinishlarini hisobga olgan holda mamlakatga qarab joriy etiladi.

Shuningdek, Yevropa Ittifoqi ham AQSh tariflariga qarshi choralarni tayyorlamoqda. Bu haqda Yevrokomissiya (YeK) prezidenti Ursula fon der Lyayyen aytib o‘tdi. Uning so‘zlariga ko‘ra, AQSh prezidenti Donald Trampning barcha mamlakatlar, jumladan, Yevropa Ittifoqi tovarlariga bojlar joriy etish haqidagi qarori jahon iqtisodiyotiga jiddiy zarba beradi.

YeK rahbarining eslatishicha, YeI har doim AQSh bilan savdo to‘siqlarini bartaraf etish bo‘yicha muzokaralarga ochiq.

«Shu bilan birga, biz qarshi choralar ko‘rishga tayyormiz. Biz po‘lat tariflariga javoban birinchi paketni tayyorlamoqdamiz. Agar muzokaralar muvaffaqiyatsizlikka uchragan taqdirda biz o‘z manfaatlarimiz va biznesimizni himoya qilish uchun qo‘shimcha chora-tadbirlarni tayyorlayapmiz», dedi u.