Rossiyada Qora dengizda mazut to‘kilishidan yetkazilgan zarar baholandi

Rosprirodnadzor Qora dengizda mazut to‘kilishi natijasida atrof-muhitga yetkazilgan zararni deyarli 85 milliard rublga baholadi, dedi agentlik rahbari Svetlana Rodionova 4 aprel, juma kuni tankerlar halokati oqibatlarini bartaraf etish bo‘yicha yig‘ilishda.

Uning so‘zlariga ko‘ra, zararni "Volgoneft-212" va "Volgoneft-239" tankerlari egalari qoplashi kerak: "Kama Shipping" - 49,4 mlrd rubl, "Volgatransneft" - 35,4 mlrd rubl. Rodionovaning ta’kidlashicha, kompaniyalar yetkazilgan zararni ixtiyoriy ravishda qoplashi uchun bir oy vaqt bor, shundan so‘ng da’volar sudga yuboriladi.

Yig‘ilishda Rossiya transport vaziri Roman Starovoit tanker halokati sabablarini tekshirish yakunlanganini ma’lum qildi. Uning so‘zlariga ko‘ra, asosiy sabab «kema kapitanlari va kema egalarining Azov dengizi va Kerch bo‘g‘ozi dengiz hududlarida yelkanli kemalar uchun mavsumga qo‘yilgan cheklovlarga rioya qilmagani». Starovoyt, shuningdek, «kema ekipajlari Rossiya Transport vazirligining huquqiy hujjatlariga muvofiq malakali xodimlar bilan ta’minlanmagan» deb da’vo qilmoqda.

"Kama Shipping" kompaniyasi "Volgoneft-212" tankerining cho‘kib ketishida aybini tan olmadi. Tashkilot sudga taqdim etgan hujjatlarni qo‘shish to‘g‘risidagi arizada kemaning egasi «Kamatransoyl» kompaniyasi ekani, «Kama Shipping» esa kemalarni ijaraga beruvchi ekanligi ko‘rsatilgan. Ikkala tashkilotga qarshi da’vo "Morspasslujba" tomonidan berilgan — u tanker halokati oqibatlarini bartaraf etish bo‘yicha ishlarni bajarganlik uchun qilingan xarajatlarni qoplash bilan bog‘liq.