ChatGPT O‘zbekistonda soliq to‘lovchi sifatida ro‘yxatdan o‘tdi

ChatGPT chatboti va DALL-E raqamli tasvirlarni yaratish modeli ishlab chiquvchisi bo‘lgan OpenAI sun’iy intellekt kompaniyasi O‘zbekistonda QQS to‘lovchisi sifatida ro‘yxatdan o‘tdi.

Foto: Shutterstock

OpenAI kompaniyasi O‘zbekistonda elektron xizmat ko‘rsatuvchi xorijiy kompaniya sifatida ro‘yxatdan o‘tdi. Bu haqda Yirik soliq to‘lovchilar bo‘yicha hududlararo soliq inspeksiyasi xabar berdi.

«ChatGPT (Chat generative pre-trained transformer) sun’iy intellekt chatboti va DALL-E raqamli tasvirlarni yaratish modeli ishlab chiqaruvchisi Amerikaning OpenAI kompaniyasi O‘zbekistonda QQS soliq to‘lovchisi sifatida ro‘yxatdan o‘tdi”, deyiladi inspeksiya xabarida.

Ayni paytda ChatGPT’ning o‘zbekistonliklar uchun 3 xil versiyasi mavjud: bepul, 20 dollarlik Plus va 200 dollarlik Pro. Kompaniyaning rasmiy soliq to‘lovchi sifatida ishlashni boshlashi narxlarga qanday ta’sir qilishi hozircha noma’lum.

Ma’lumot uchun, O‘zbekistonda ro‘yxatdan o‘tgan xorijiy internet-kompaniyalari soni 67 taga yetdi. 2025 yil boshidan beri jami 7 ta kompaniya soliq to‘lovchisi sifatida ro‘yxatdan o‘tgan.