Saudiyada och va boshpanasiz qolgan ziyoratchilar O‘zbekistonga qaytarildi

Shu yilning dastlabki uch oyida litsenziyasiz umra safarini tashkil qilish bo‘yicha 34 ta jinoyat ishi qo‘zg‘atildi, 46 nafar shaxs jinoiy javobgarlikka tortildi. Bu haqda «O‘zbekiston 24» telekanalida ma’lumot berildi.

Shuningdek, noqonuniy faoliyat yuritgan 53 ta turistik xizmat ko‘rsatuvchi sub’yekt faoliyati to‘xtatildi. Mas’ullar bildirgan ma’lumotlarga ko‘ra, ba’zi turfirmalar o‘z zimmasiga olgan vazifani bajarmagani sababli ko‘plab fuqarolar Saudiya Arabistonida og‘ir holatga tushib qolgan.

«Yurtdoshlarimiz sarson bo‘lib, o‘sha joylarda necha kunlab och va yotoqsiz qolib ketishdi», deb ma’lum qildi O‘zbekiston musulmonlari idorasi raisi o‘rinbosari Zayniddin Eshonqulov.

Ziyorat maqsadida Saudiya Arabistoniga borgan, biroq noqonuniy tashkil etilgan safar oqibatida muammoga duch kelgan jami 580 nafar fuqaro charter reys orqali yurtga qaytarilgan.

Avvalroq, DXX Haj va Umra ziyoratiga noqonuniy ravishda yubormoqchi bo‘lgan shaxslar aniqlangani haqida xabar bergan edi.