Mer: Xarkivga uchuvchisiz uchoqlar hujum qildi

Ukraina shimoli-sharqidagi Xarkiv shahri Rossiya Qurolli kuchlarining uchuvchisiz uchoqlari tomonidan hujumga uchradi. Bu haqda 2 may, juma kuni shahar meri Igor Terexov Telegramʼda ma’lum qildi.

Uning so‘zlariga ko‘ra, zarbalar shaharning to‘rtta tumanida – Kiyev, Osnovyanskiy, Slobodskiy va Saltovskiyda 12 ta nuqtaga berilgan. Bir qator joylarda portlashlar kuzatilib, yong‘inlar sodir bo‘ldi. 46 kishi, jumladan, 11 yoshli bola tan jarohati oldi, sakkiz nafari kasalxonaga yotqizildi, dedi Terexov.

Bir turar joy binosi, shuningdek, dastlabki ma’lumotlarga ko‘ra, xususiy uy shikastlangan.

«Ehtiyot bo‘ling — Xarkivga yana dronlar yaqinlashmoqda!» — qo‘shimcha qildi shahar hokimi.

Ukraina harbiy-havo kuchlari ma’lumotlariga ko‘ra, Rossiya Federatsiyasining Belgorod viloyatidan Xarkiv viloyati yo‘nalishi bo‘yicha uchuvchisiz uchoqlar guruhi uchirilgan. Bundan tashqari, yana bir guruh janubdan Zaporijjya yo‘nalishi bo‘yicha uchirildi, deya ta’kidladi Ukraina tomoni.